පැණිරසත් ඇඹුල් රසත් එකට කැටි වූ කාමරංගා .......

කැල්සියම්(Ca), මැග්නීසියම්(Mg), පොටෑසියම්(K), සින්ක්(Zn), යකඩ(Fe), විටමින් C,A,B ආදී ඛණිජ ලවණ විශාල ප්‍රමාණයකින් මෙන්ම, ප්‍රතිඔක්සිකාරක ගුණයෙන්ද පොහොසත් කාමරංගා දකුණු ආසියාව තුල සුලබව දක්නට ලැබෙන පළතුරකි. කාමරංගා වල ඇති ඇඹුල් රසය නිසා උෂ්ණාධික පළතුරක් ලෙස ජනවහරේ  පැවතියත්, ඇතැම් රෝගී තත්ත්වයන්හිදී ශරීරයට සිසිලසක් ලබාදීමට කාමරංගා යුෂ එක්කරගත හැකි බව නවීන විද්‍යානුකූල පරීක්ෂණ වලින් තහවුරු කරගෙන ඇත.

කාමරංගා ශාකයේ ගෙඩි පමණක් නොව, කොළ සහ පොතුද ඖෂධීය ගුණයන්ගෙන් යුක්ත වේ.

 

 කාමරංගා ආහාරයට ගැනීමෙන් ලගා කර ගත හැකි සෞඛ්‍යමය ප්‍රතිලාභ බොහොමයකි. ඉන් සමහරක් නම්,

•    කාමරංගා වල ඇති විටමින් C මගින් ප්‍රතිශක්තීකරණ පද්ධතිය ශක්තිමත් කර, ලෙඩ  රෝග වලින් ශරීරය ආරක්ෂා කරදෙයි.
•    විටමින් A මගින් ඇස්වල නීරෝගීතාව ඇති කරයි.
•    එහි ඇති සෝඩියම්(Na) සහ පොටෑසියම්(K) සංයෝග නිසා රුධිර පීඩනය,  කොලොස්ටරෝල් මට්ටම පාලනය කරයි.
•    මැග්නීසියම්(Mg) මගින් සුවබර නින්දක් ලගා කර දෙයි.
•    කාමරංගා වල ඇති සින්ක්(Zn) කුරුලෑ සහ විවිධ අසාත්මිකතා නිසා සමේ ඇතිවන  රතු ලප සුවකරගැනීමට  මහෝපකාරී වේ.
•    හිසකෙස් වල සෞඛ්‍ය ආරක්ෂා කරදෙයි.
•    එහි ඇති තන්තුමය ස්වාභාවය මගින් ආහාර දිරවීම වේගවත් කරන අතරම, ග්ලූකෝස් සිරුරට උරා ගැනීම නතර කර, සීනි පාලනය කරයි.
• කාමරංගා වල ඇති ජලය නිසා බඩවල් පිරිසිදු කරයි.
•    කාමරංගා මගින් හෝමෝන පද්ධතියේ නිසි ක්‍රියාකාරිත්වය ඇති කරයි.
•    ගර්භනී මව්වරුන්ට අවශ්‍ය ෆෝලික් ඇසිඩ්, විටමින් B සැලකිය යුතු ප්‍රමාණයක් කාමරංගා වල අඩංගුය. එමගින් කුසේ සිටින දරුවාගේ මොළයේ වර්ධනය වැඩිකරයි.
•    දරු ප්‍රසූතියෙන් පසුවත් කාමරංගා ආහාරයට ගැනීමෙන් මව්වරුන්ගේ කිරි එරීම වැඩිකරයි. 

සැ.යු. –  කාමරංගා වල ඇති ඔක්සලික් අම්ලය නිසා වකුගඩු රෝග සහිත පුද්ගලයින්ට විවිධ සංකූලතා ඇතිවිය හැකි බව පරීක්ෂණ වලින් තහවුරු කරගෙන ඇත. 

උපුටා ගැනීම :-   

පොත පත සහ අන්තර්ජාලය ඇසුරිනි.

 

සැකසුම:-                                                                                                                                                                ඒ.ටී. පතිරත්න - විද්‍යා හා තාක්ෂණ නිලධාරී, බියගම විදාතා සම්පත් මධ්‍යස්ථානය

Posted in: ආහාරஉணவு, සෞඛ්‍යයசுகவாழ்வு