අනාගතය දෙස එබී බැලීම සැම විට ම චමත්කාරජනක අත්දැකීමක්‌.
අනාගතය කෙබඳු තැනක්‌ වනු ඇත් දැයි යන්න පුරෝකථනය කරන්නට හැම දා ම මිනිසුන් උත්සාහ
කරනවා. එවැනි පුරෝකථන අනාගතයේ සැබෑ වීමට ඉඩ ඇතිවා සේ ම කිසිවකු පුරෝකථනය නො කළ දේ
ද අනාගතයේ සිදු වන්නට පුළුවන්.තාක්‌ෂණයේ දියුණුව කිසි දා නො නැවතී ඉදිරියට ගලා යන ගඟක්‌ බඳුයි. දැනට වසර දහයකට පහළොවකට පෙර අපව විස්‌මයට පත් කිරීමට සමත් වූ නවීන තාක්‌ෂණික උපාංග අද සැම දෙනා අත ම පවතින අතිශය සාමාන්‍ය උපාංග බවට පත් වී තිබෙනවා. මේ ප්‍රවණතාව නවතින බවක්‌ නම් පෙනෙන්නට නැහැ. මේ ලිපියෙන් අප ඔබ වෙත තොරතුරු ගෙන එන්නේ තවත් දශක දෙකකින් එනම් 2035 වන විට ලෝකයේ සාමාන්‍ය භාවිතාවන් ව පැවතිය හැකි තාක්‌ෂණික නව නිපැයුම් හතක්‌ ගැනයි. මේ පුරෝකථනයන් කර තිබෙන්නේ අද වන විට නිර්මාණය වෙමින් පවතින තාක්‌ෂණික විභවතාවන් මත පිහිටා නිසා මේවා මෙලෙසින් ම සැබෑවන් බවට පත් වීමට විශාල ඉඩක්‌ තිබෙනවා. වසර විස්‌සක්‌ යනු විශාල කාලයක්‌ නො වන නිසා අප ඔබ වැඩි දෙනකුට මේ තාක්‌ෂණික නව නිර්මාණ ලෝකයට බිහි වන අයුරු දැකගැනීමට හා ඒවා සජීවී ව අත්දකින්නට හැකි වේ වි. එවිට මේ අපූරු විස්‌මයන් සාමාන්‍ය දේ බවට පිළිගැනීමට අප අපේ සිත්සතන් වෙනස්‌ කරගන්නවා නොඅනුමානයි.
01. කෘත්‍රිම බුද්ධි - පෞද්ගලික සහකරුවන්
තවත් වසර විස්‌සකට පසු ලෝකයේ බිහි ව තිබෙනු ඇති පෞද්ගලික සහායක පරිගණක වැඩසටහන්වලට සාපේක්‌ෂව මේවා පෙනෙනු ඇත්තේ සෙල්ලම් බඩු ලෙසයි. අනාගතයේ බිහි වන පෞද්ගලික සහකරුවන් දවසේ පැය විසි හතර පුරා ම අප පිළිබඳව සොයා බලමින් සිටිනු ඇති. ඒවා අපේ චර්යා රටාවන්, අපේ හැඟීම් හා ආකල්ප අප කැමැති අකැමැති දේ පිළිබඳව අධ්‍යයනය කරමින් ඊට අනුරූපව අපේ කටයුතු කරගෙන යැමට අපට උපකාර කරනු ඇති. යම් සිදුවීමක්‌ සිදු වූ විට අප කෙබඳු ආකාරයකින් හැසිරෙනු ඇත් ද යන්න නිවැරදිව පුරෝකථනය කර එයට අවශ්‍ය කටයුතු අපට කලින් ම සිතා සම්පාදනය කර තැබීමට ඒවා සමත්කම් දක්‌වා වි. අපේ කායික මානසික සෞඛ්‍යය ගැන සොයාබලන්නටත් බිල් ගෙවීම්, භාණ්‌ඩ ඇණවුම් කිරීම්, ලිපි ලිවීම් වැනි දහසකුත් එකක්‌ ගෙදරදොරේ හා කාර්යාලයේ වැඩ කර දීමටත් මේවා සමත් වනු නොඅනුමානයි. එක්‌ අතකින් ඒවා අපේ මනසේ ඩිජිටල් ක්‌ලෝන ලෙස ද ක්‍රියාත්මක වනු ඇති. අන්තර්ජාලය තුළ මෙන්ම සැබෑ ලෝකය තුළ ද හොලෝග්‍රැෆික්‌ රූ ලෙස අප වෙනුවෙන් පෙනී සිට කටයුතු කර දීමට මේවා සමත් වන බවට සැකයක්‌ නැහැ. කෙසේ වෙතත් අප වෙනුවෙන් කටයුතු සංවිධානය කිරීමට හෝ තීන්දු තීරණ ගැනීමට මේ පෞද්ගලික සහකරුවන්ට හෝ සහකාරියන්ට කෙතරම් දුරකට ඉඩ දිය යුතු ද යන්න ගැන එදිනට අපට සලකා බලන්නට සිදු වනු ඇති.
02. නො පෙනෙන පරිගණක - හැමතැන ම
මෙවැනි ඇසට නො පෙනෙන විවිධ තාක්‌ෂණික උපාංග දහස්‌ ගණනක්‌ පිරුණු ලෝකයක ජීවත් වීම අනාගතයේ දී අපට සාමාන්‍ය දෙයක්‌ වනු ඇති බවට සැකයක්‌ නැහැ. එලෙස ම එය අපේ සමාජ සංස්‌කෘතික වටපිටාවට ද අද අපට පෙරැයිය නොහැකි අන්දමේ වෙනස්‌කම් තොගයක්‌ ද එකතු කරනු ඇති බව ද අමුතුවෙන් කිව යුතු නැහැ.
03. ඩිජිටල් මනස්‌ සහිත අථ්‍යය සතුන්
අපේ ඩිජිටල් මොළ ඇතුළත් කළ රොබෝ ශරීර මතින් සවාරිගැසීම තවත් ශතවර්ෂයකට වැඩි දුරකින් ඇති සිහිනයක්‌ වුවත් ඩිජිටල් මනස්‌ සහිත අථත්‍ය සතුන් බිහි වන දිනය වැඩි ඈතක ඇත්තේ නැහැ. කෙසේ නමුත් එවැනි ඩිජිටල් සතුන් තම පැවැත්ම නිසා වද වේදනා විඳිනවා ද වැනි සදාචාරාත්මක පැනයන්ට පිළිතුරු සැපයීමට ද එවැනි දිනක අපට සිදු වනු ඇති.
04. ඝාතනයට අවසර ඇති ස්‌වයංක්‍රීය රෝබෝවන්
ස්‌වයංක්‍රීයව සතුරා හඳුනාගෙන ඔහුට පහර දී විනාශ කළ හැකි අවි පද්ධති ගණනාවක්‌ මේ වන විටත් නිර්මාණය වී තිබෙනවා. රටවල් ගණනාවක නාවික හමුදා භාවිත කරන Aegis Combat system එවැන්නක්‌. බලගතු පරිගණක හා රේඩාර් පද්ධති පරිහරණය කරන එයට ස්‌වයංක්‍රීය ව ම සතුරු ඉලක්‌ක හඳුනාගෙන මිසයිල ප්‍රහාර එල්ල කර ඒවා විනාශ කළ හැකියි. Samsung Techwinසමාගම නිපදවා දැනටමත් දකුණු කොරියාව, ඊශ්‍රායලය වැනි රටවල් භාවිත කරන SGR-A1 ආරක්‌ෂක රොබෝව ද එවැන්නක්‌. දේශ සීමා අසල පිහිටුවා ඇති මේ අවි පද්ධතියට සැතපුම් දෙකක පමණ දුර සිට පවා ඒ දෙසට පැමිණීමට උත්සාහ කරන සතුරන් හඳුනාගෙන වෙඩි තබා විනාශ කර දැමිය හැකියි. දැනට මෙවැනි උපාංගවලට වෙඩි තැබීමට පෙර මිනිසකු ඊට අවසර දිය යුතු පරිදි වන සේ ප්‍රොaටකෝලයක්‌ ඇතුළත් කර තිබෙනවා. එහෙත් දිනෙන් දින සංකීර්ණ වන යුදමය තත්ත්වයන් යටතේ තවත් කෙටි කලක්‌ ගත වන විට මෙවැනි ප්‍රොaටකෝලයන් ඉවත් කර දැමීමට හමුදාවන් ක්‍රියා කිරීමට බොහෝ සේ ඉඩ තිබෙනවා.
හමුදා නායකයන් තම සොල්දාදුවන් අනතුරේ දමනවාට වඩා මෙබඳු අවිවලට බලය පැවරීමට තීරණය කිරීම අතිශය ස්‌වාභාවිකයි. එපමණක්‌ නො ව විශාල භූමි පරාසයක්‌ ආවරණය කිරීම සඳහා මෙබඳු යන්ත්‍ර යොදාගැනීම මානව සම්පත් යොදාගන්නවාට වඩා කාර්යක්‌ෂම වනවා. මිනිස්‌ අවසරයකින් තොර ව වෙඩි තැබීමට හැකි යන්ත්‍ර පිළිබඳ විරෝධතා මතු වී තිබුණත් යුද බලවතුන් ඒවා කනකට ගනී යෑයි සිතන්නට අපහසුයි.
05. පර්යේෂණාගාරයේ නිපදවන අවයව හා මස්‌
පර්යේෂණාගාර තුළ කෘත්‍රිමව සෛල වර්ධනය කිරීමට ඇති හැකියාව සහ ත්‍රිමාන මුද්‍රක (3D printers) ආශ්‍රයෙන් ඒවා පෙළගස්‌වන්නට ඇති හැකියාව මෙහි දී කැපී පෙනෙන එක්‌ ක්‍ෂෙත්‍රයක්‌. මස්‌ පරිභෝජනය කිරීම සඳහා සතුන් මැරීම වෙනුවට කෘත්‍රිම මස්‌ නිපදවීම එම ක්‍ෂෙත්‍රයේ එක්‌ ආකර්ෂණීය පොරොන්දුවක්‌ වනවා. න්‍යායාත්මකව හා පර්යේෂණාත්මක ව එය කිසිසේත් නො කළ හැක්‌කක්‌ නො වෙයි. තවත් දශක දෙකක කාලයක්‌ ගත වන විට එය ප්‍රායෝගික භාවිතයක්‌ බවට පත් වීමට විශාල ඉඩක්‌ තිබෙනවා. සත්ත්ව ඝාතනය ලෝකය පුරා බොහෝ දෙනකු ගේ විරෝධයට ලක්‌ වන දෙයක්‌. මස්‌ නිසා සතුන්ට වැළඳෙන රෝග මිනිසාට බෝ වීමේ අවදානමක්‌ ද තිබෙනවා. අනෙක්‌ අතට සතකු නඩත්තු කිරීමට වැය වන ජලය, තණකොළ ප්‍රමාණය හා උගේ ජීවිත කාලය පුරා පිට කරන කාබන්ඩයොක්‌සයිඩ් ප්‍රමාණය ගැන සලකන විට මස්‌ පිණිස සතුන් ඇති කිරීම මිනිසාට එතරම් වාසිදායක ගනුදෙනුවක්‌ නො වෙයි. මේ සියල්ල අතරේ ලෝකයේ මස්‌ පරිභෝජනයත් දිනෙන් දින ඉහළ යනවා. එය 2050 වන විට අද මෙන් දෙගුණයක්‌ වනු ඇති බවයි පුරෝකථනය කෙරී ඇත්තේ. මේ තත්ත්වයට හොඳ ම විසඳුම සෛල ජනනය මගින් කෘත්‍රිම ව මස්‌ නිපදවීමයි. තවත් වසර විස්‌සක්‌ ගත වන විට මස්‌ බඳු ම පාට, හැඩය හා රසය ඇති කෘත්‍රිම මස්‌ ඔබේ සුපිරි වෙළෙඳසලෙනුත් මිල දී ගන්නට හැකි වන්නට පුළුවන්. Modern medowවැනි සමාගම් දැනටමත් මේ උත්සාහයේ ඉදිරියෙන් සිටිනවා.
මෙය හා ම බැඳී එන අනෙක්‌ මාතෘකාව වන්නේ කෘත්‍රිම ව ජෛව අවයව වර්ධනය කිරීමයි. දැනටමත් මේ ක්‍රමය මගින් සරල ඉන්ද්‍රියයන් නිර්මාණය කිරීම් වාර්තා වනවා. පසුගිය දා ප්‍රින්ස්‌ටන් සරසවියේ පර්යේෂකයන් පිරිසක්‌ 3D මුද්‍රණ යන්ත්‍රයක්‌ උපයෝගී කරගනිමින් මිනිස්‌ ශ්‍රව්‍ය පරාසයට වැඩි ශබ්ද පරාසයක්‌ ග්‍රහණය කරගත හැකි ඉලෙක්‌ට්‍රොනික උපාංගයක්‌ සම්බන්ධිත ජීව සෛලවලින් සෑදුණු කනක්‌ නිර්මාණය කර තිබුණා. අපට දුබල වූ ඉන්ද්‍රියයන් ප්‍රතිස්‌ථාපනය කිරීමට පමණක්‌ නො ව මිනිස්‌ හැකියාව ඉක්‌මවා ගිය හැකියාවක්‌ ලබාගන්නට ද මේ තාක්‌ෂණය භාවිත කළ හැකි බව ඉන් පෙනී යනවා. හදවත් වැනි ඉන්ද්‍රියයන් රෝගියා ගේ ශරීරය විසින් ප්‍රතික්‌ෂේප නො කෙරෙන අන්දමට ඔහුට ම ගැලපෙන පරිදි නිර්මාණය කිරීමට මෙමගින් අවස්‌ථාව සැලසෙනවා. තවත් වසර විස්‌සක්‌ යන විට මේවායේ ප්‍රායෝගික භාවිතාවන් සුලබව අපේ වෛද්‍ය විද්‍යා ක්‍ෂෙත්‍රය තුළ යොදාගැනෙනු ඇති.
06. මහ මුහුදෙන් පානීය ජලය
ලෝකයේ ජනගහනය දිනෙන් දින ම වර්ධනය වන අතර නාගරීකරණය ද දිනෙන් දින ඉහළ යනවා. මීට සාපේක්‌ෂව ජල ඉල්ලුම ද ඉහළ යැම වැළැක්‌විය නොහැක්‌කක්‌. ලෝකයේ බොහෝ ප්‍රදේශවල දැනටමත් පිරිසිදු පානීය ජලය සොයාගැනීම උග්‍ර ගැටලුවක්‌ වී තිබෙනවා. මෙයට විසඳුම විය හැක්‌කේ කුමක්‌ ද? අනාගතයේ ඇති වන විශාල ජල ඉල්ලුම පුරවන්නට නම් අපට සාගරය වෙතට ම යොමු වන්නට සිදු වනවා.
ලෝකයේ ඇති සම්පූර්ණ ජලයෙන් අපට භාවිත කළ හැකි පිරිසිදු ජලය ලෙස පවතින්නේ සියයට 1ක්‌ පමණයි. කොටසක්‌ අයිස්‌ තට්‌ටු ලෙස පවතින අතර සියයට 97.5ක්‌ ම පවතින්නේ ලුණු මිශ්‍රිත සාගර ජලය ලෙසයි. යම් හෙයකින් සාගර ජලය පහසුවෙන් පිරිසිදු ජලය බවට හැරවිය හැකි නම් ඉන් මානව ජල අවශ්‍යතාව සහමුලින් ම විසඳී යන බව පැහැදිලියි.
දැනට ලවණ ජලය පිරිසිදු කිරීම සඳහා භාවිත වන සාම්ප්‍රදායික ක්‍රම සඳහා වැය වන මිල ඉතා අධිකයි. ඊශ්‍රායලය, සෞදි අරාබිය වැනි රටවල් මහ පරිමාණයෙන් මෙය සිදු කළත් ජලය පිරිසිදු කිරීම සඳහා වැය වන බලශක්‌තිය අධික වීම එහි බහුල භාවිතය අධෛර්යය කරන්නක්‌. මේ ගැටලුවලට පිළිතුරු සැපයීම සඳහා පර්යේෂකයන් සූර්ය තාපයේ බලයෙන් මුහුදු ජලය පිරිසිදු කිරීමේ ක්‍රමවේදයන් හඳුන්වා දී තිබෙනවා. සංකේන්ද්‍රිත සූර්ය බලය (Concentrated Solor Power - CSP) අනාගතයේ මහා පරිමාණයෙන් භාවිතයට පැමිණෙතැයි සැලකෙන එබඳු ක්‍රමයක්‌. මෙහි දී සිදු වන්නේ විශාල ප්‍රදේශයකට වැටෙන හිරුඑළිය එක්‌ තැනකට කේන්ද්‍රගත කර එහි දී ලැබෙන තාපයෙන් ජලවාෂ්ප නිපදවා ටර්බයින කරකැවීමෙන් ලැබෙන ශක්‌තිය ජලය පිරිසිදු කරවීම සඳහා යොදාගැනීමයි.
සංකේන්ද්‍රිත ප්‍රකාශ විද්යුත් කෝෂ (Concentrated potovoltaic cells - CPV) ද මෙබඳු තාක්‌ෂණයක්‌. එහි සූර්ය කෝෂ තනා ඇත්තේ කුඩා උත්තල කාච ගණනාවකින්. ඒවායෙන් සංකේන්ද්‍රණය කරන හිරු එළිය සාමාන්‍ය ලෙස විදුලිය නිපදවන අතර සූර්ය කෝෂ තලය දිගේ විහිදුණු ජලය ගලා යන කේෂිකා ජාලයක්‌ හරහා ජලවාෂ්ප නිපදවා ඒ හරහා ද විදුලිය නිපදවා ගැනෙනවා. මේ ශක්‌තිය ඉන් පසුව යොමු කෙරෙන්නේ ප්‍රති ආස්‍රැතිය (Rivers Osmosis) වැනි ක්‍රම හරහා ජලය පිරිසිදු කිරීමටයි.
මේ තාක්‌ෂණයන් තවදුරටත් වැඩිදියුණු වීම සමඟ ඒවායේ මිල ද විශාල ලෙස පහළ වැටෙතැයි අපේක්‌ෂා කළ හැකියි. තවත් වසර විස්‌සක්‌ ගත වන විට ලොවපුරා මුහුදු ජලයෙන් නිපදවූ වතුර ලාබයට බීමට ගත හැකි වීම පිළිබඳව අපට බලාපොරොත්තු තබාගත හැකියි.
07. ලොව සැමට අන්තර්ජාලය
ලෝකයේ අධිතාක්‌ෂණයේ වේගවත්. ඉදිරි ගමනට අන්තර්ජාල පහසුකම් නොමැති වීම විශාල බාධාවක්‌. ලෝකයේ දැවැන්ත ආධිපත්‍යයක්‌ පතුරුවාගෙන සිටින ෆේස්‌බුක්‌ හා ගූගල් වැනි සමාගම් දැන් ලෝකයේ සැමට අන්තර්ජාල පහසුකම් සැපයීමේ කර්තව්‍යයට අතගසා තිබෙනවා. එය එක්‌ අතකින් ඔවුන් ගේ සේවාවන් ව්‍යාප්ත කිරීමට ඇති බාධා ජයගැනීමක්‌ ද වනවා. බැලුන් මගින් අන්තර්ජාල සේවාවන් සැපයීමට උත්සාහ දරන ගූගල් ලූන් ව්‍යාපෘතිය ඊට එක්‌ උදාහරණයක්‌. මීට අමතර ව ගූගල් හා ෆේස්‌බුක්‌ සමාගම් දෙක ම විසින් පසුගිය දා ෙඩ්‍රාaන් යානා නිපදවන සමාගම් මිල දී ගනු ලැබුවා. ඔවුන් ගේ අරමුණ ඉහළ අහසේ අඛණ්‌ඩව දිගු කලක්‌ ගමන් කරන ෙඩ්‍රාaන් යානා සමූහයක්‌ හරහා ලොවට ම අන්තර්ජාල සේවා සැපයීමයි. මීට අමතර ව ලොව අංක එකේ විදුලි මෝටර් රථ සමාගමක්‌ වන ටෙස්‌ලාහි ප්‍රධාන විධායක නිලධාරී Elon Musk ද පසුගිය දා කියා සිටියේ චන්ද්‍රිකා සමූහයක්‌ හරහා ලෝකයට ම අන්තර්ජාල පහසුකම් සැපයීම තමා ඉටු කරගැනීමට බලාපොරොත්තු වන සිහිනයක්‌ බවයි.
මේ කවර ක්‍රමයකින් හෝ වේ වා මීළඟ දශක දෙක තුළ ලෝකයේ විශාල වපසරියකට අන්තර්ජාල පහසුකම් ලාභදායී ව ලබා දීමට හැකි වනු ඇතැයි අපේක්‌ෂා කළ හැකියි. ලෝකය වචනයේ පරිසමාප්ත අර්ථයෙන් ම විශ්ව ගම්මානයක්‌ බවට පත් වනු ඇත්තේ එවිට පමණයි.
අන්තර්ජාලය ඇසුරෙන්
විද්‍යා හා තාක්ෂණ නිලධාරි, පාදුක්ක.
0 comments:
Post a Comment