ස්වභාවික දැව වලට වානේ ශක්තියක්

ගස් වලින් ලබා ගන්නා ස්වභාවික දැව වානේ මෙන් ශක්තිමත් කිරීමට පර්යේෂකයෝ සමත් වී ඇති බව වාර්තා වේ. දිය උරාගන්නා ව්‍යූහයන් සහිත ස්වභාවික දැව නවීකරණය කරමින් නව සුපිරි දැව වර්ගය නිපදවූ බව වාර්තාවේ සදහන් වේ. ඒ සදහා ස්වභාවික දැව රසායනික නැහැවුමකට සහ උණුසුම් තෙරපුමකට භාජනය කර තිබේ.

ස්වභාවික දැව සාමාන්‍යයෙන් සෙලියුලෝස් 50% ප්‍රමාණයකින්ද දැව වර්ගය අනුව ලිග්නින් 20% ක් ප්‍රමාණයකින්ද ඉතිරිය හෙමිසෙලියුලොස් වලින්ද සමන්විත වේ. සෝඩියම් හයිඩ්රෝක්සයිඩ් සහ සෝඩියම් සල්ෆේට් ද්‍රාවණයක විවිධ වර්ගවල දැව පය 7 ක පමණ කාලයක් උණු කිරීමෙන් එම දැව වල සෙලියුලෝස් වටා පිහිටි ලිග්නින් ඉවත්කිරීමට මෙන්ම දැව ව්‍යුහය තුල වැඩි ඉඩ ප්‍රමාණයක් ඇති කිරීමට හැකි වී තිබේ. ලිග්නින් යනු සෙලියුලෝස් එකට බැඳ තබා ගන්නා බහු අවයවයකි. ඉන්පසුව මෙම දැව එක් දිනක් 100⁰ C උෂ්ණත්වයකට සහ මෙගා පැස්කල් 5 ක හෙවත් මුහුදු මට්ටමේ වායුගෝලීය පීඩනය මෙන් 50 ගුණයක පීඩනයකට භාජනය කිරීම මගින් සෙලියුලෝස් නාල (නැනෝ තන්තු) අන්තර්බද්ධ කිරීම සිදු කර තිබේ.

මෙම ක්‍රියාවලිය නිසා දැව එහි ස්වභාවික ඝනකම පස් ගුණයකින් කුඩාවීමකටද, ස්වභාවික ශක්තිය 11.5 ගුණයකින් වැඩිවීමකටද ස්වභාවික ඝනත්වය තුන් ගුණයකින් වැඩිවිමකටද භාජනය විය. එනම් නව සුපිරි දැව ඉතා ශක්තිමත් වේ. එය වානේ මෙන් ශක්තිමත් බව පර්යේෂණ වලින් තහවුරු කර ගෙන තිබේ. තත්පරයකට මීටර 30 ක වේගයකින් විදීමෙන් උණ්ඩය ස්වභාවික දැව සිදුරු කරගෙන ගමන් කරන නමුත් නව සුපිරි දැව තුල උණ්ඩය ගිලියාමක් පමණක් සිදුවේ.

 

සිවිල් ඉංජිනේරු ක්ෂේත්‍රයේ බොහෝ ඉදිකිරීම් සහ වාහන නිෂ්පාදන සදහා වානේ වලට වඩා සැහැල්ලු එහෙත් වානේ තරම් ශක්තිමත් නව සුපිරි දැව යොදා ගත හැකි වේ යැයි පර්යේෂකයන්ගේ අදහසයි. 2010 වසරේදී වානේ නිෂ්පාදනය නිසා සිදුවූ විමෝචනය ටොන් මිලියන 2500 ක් පමණ වන අතර වසර 2050 වන විට විමෝචනය ටොන් මිලියන 2800 දක්වා වර්ධනය වනු ඇතැයි සැලකේ. වානේ නිෂ්පාදනයේ ප්‍රධාන රාජ්‍ය වූ චීනය දැනටමත් වානේ නිෂ්පාදනයේදී සිදුවන මෙම විමෝචනය අඩු කිරීමට දරණ ප්‍රයත්නයේදී සුපිරි දැව ප්‍රධාන කාර්යයක් ඉටු කරනු ඇතැයි පර්යේෂක කණ්ඩායමේ සම කතෘ මේරිලන්ඩ් විශ්ව විද්‍යාලයේ  යාන්ත්‍රික විශේෂඥ ලි ටෙන්ග් ප්‍රකාශ කර තිබේ.

අන්තර්ජාලයේ පිළිගත් විද්‍යාත්මක ප්‍රභව ඇසුරෙන් සකස්කළේ : හර්ෂ ලංකේශ්වර

https://youtu.be/5rj7GWDUXDU?t=3

Posted in: ඉංජිනේරු, ශාක