June 15, 2016

ඇස්බෙස්ටොස්

ඇස්බෙස්ටොස් ස්වභාවික ඛණිජයක් වන අතර තන්තු හා කෙදි වශයෙන් පරිසරයේ පවතී. විවිධ හැඩයෙන් යුත් මෙය සුදු, නිල් හා දුඹුරු පැහැයෙන් යුක්තය. ඇස්බෙස්ටොස් තන්තු තාපයට, ගින්නට හා රසායනික ක්‍රියාවලට ප්‍රතිරෝධි වන අතර විද්‍යුතය සන්නයනය නොකරයි. එමෙන්ම කල් පවතී. ඇස්බෙස්ටොස් වල පවතින මෙම ගුණාංග නිසා කර්මාන්ත රැසකට බහුල වශයෙන් එය යොදා ගනී.

ඇස්බෙස්ටොස් නිෂ්පාදන ලෙස වහල ආවරණ තහඩු ,ගෙබිම අතුරන ටයිල් ,සිවිලිම් අමුද්‍රව්‍ය දැක්විය හැක. මීට අමතරව වාහන වල කොටස් , වතුර ටැංකි හා වැසිකිලි ටැංකි සෑදීමටද එය භාවිතා කෙරේ. ගින්නට ඔරොත්තු දෙන බැවින් ඇස්බෙස්ටොස් වැඩි වශයෙන්ම ආවරණ ලෙස යොදා ගන්නා අතර ඒ අතුරින් පයිප්ප ආවරණයට යොදා ගන්නා ඇස්බෙස්ටොස්  වල විෂ අධික වේ. තවද නැව්, යුධ ටැංකි, ගුවන් යානා සහ ට්‍රක් ආදිය නිෂ්පාදනයේදි හා හමුදා ක්ෂේත්‍රෙයේ විවිධ ගොඩනැගීම් සදහාද එහි භාවිතය බහුලව සිදුවේ.

ලෝකයේ වාර්ෂික ඇස්බෙස්ටොස් නිෂ්පාදනය මෙට්‍රික් ටොන් මිලියන දෙකට වැඩි වන අතර ලෝක සෞඛ්‍ය සංවිධානයේ වාර්තා වලට අනුව ඇස්බැස්ටස් නිසා වාර්ෂික මරණ 43000 ක් පමණ සිදුවේ. එහි ඇති අනතුරුදායක බව නිසාම ලෝකයේ රටවල් 50 කට අධික ප්‍රමාණයක් ඇස්බෙස්ටොස් භාවිතය තහනම් කර ඇති නමුත් ඒ වෙනුවට භාවිතයට සුදුසු ආදේශකයක් සෙවීමේ ගැටළුව මතුවී තිබේ.

ඇස්බෙස්ටොස් මගින් සිදුවන හානි වලින් ආරක්ෂා වීමට ස්ථීර පිළියම වන්නේ ඒවා ඉවත් කිරීම වුවද එය නිසිලෙස නොකළ හොත් ඒවායින් තන්තු නිකුත් විය හැක. ඇස්බෙස්ටොස් කැබලි ගෙමිදුලේ හෝ අවට ඇත්නම් ඒවා ඇල්ලීමට යාමෙන් වැළකිය යුතුය. ඇස්බෙස්ටොස් තහඩු වලට ගැසීමෙන්, ඇතිල්ලීමෙන් ඒවා කම්පන වලට ලක්වීමෙන් හෝ සුළගට නිරාවරණය වීමෙන් තන්තු නිකුත්වේ. එබැවින් හානි වී තිබෙන ඇස්බෙස්ටොස් ඇල්ලීමෙන් වැළකීම මෙන්ම එම ස්ථානයට යාමෙන් වැළකීම මගින් සිදු විය හැකි හානි අවම කර ගත හැකි වේ. වැරදීමකින් අතින් ස්පර්ශ වුවහොත් වහාම අත් සේදිය යුතුය. ඉවත් කිරීමට අවශ්‍ය නම් අත්වැසුම් පැළදිම වඩාත් සුදුසුය. එසේම දරුවන්ට එවන් දේ කිරීමට පැවරීමෙන් වැළකිම මෙන්ම ඇස්බෙස්ටොස් කුඩු ඇත්නම් වැකුම් යන්ත්‍ර ක්‍රියාත්මක කිරීමෙන්ද වැළකීම අත්‍යාවශ්‍ය ආරක්ෂාකාරී පිලිවෙත් වේ.

නිවසේ කසල බදුන් වලට ඇස්බෙස්ටොස් දැමීමෙන් වළකින්න. ඔබගේ නිවසේ‍ ඇති ඇස්බෙස්ටොස් හදුනාගැනීමට ඒ පිළිබදව දන්නා අයගෙන් උපදෙස් හා මග පෙන්වීම් ලබා ගන්න. ඇස්බැස්ටස් හොද තත්වයේ ඇතිනම් හානියක් නොමැති අතර ඒවා පලුදු වී ඇති දැයි විටින් විට පරීක්ෂා කරන්න.

ඇස්බෙස්ටොස් නිසා ඇති වන රෝග අතර පෙනහලු පිළිකා, මෙස‍තෙලියෝමා පිළිකා, ඇස්බෙස්ටොස් හා පෙනහලු වල පටක ඝන වීම දැක්විය හැක. මෙම‍ රෝග වලට අමතරව කිවිසුම් යාම, කැස්ස, බර වැඩිවීම, ඇගපත අමාරු හා පපුවේ වේදනා වැනි රෝග ලක්ෂණ ඇති විය හැක.

එම නිසා ඇස්බෙස්ටොස් මගින් ප්‍රයෝජන ලබා ගැනීමට අමතරව ඉන් වන හානි වළක්වා ගැනීමටද දැනුවත් විය යුතුය.

සැකසුම-විද්‍යා හා තාක්ෂණ නිළධාරි-බලපිටිය


පොත පත ඇසුරිනි.

0 comments:

Post a Comment